Terminatori kundër Italisë

Terminatori kundër Italisë
Fatos Beqiraj është ftuar në Kombëtaren A të Malit të Zi, për dy ndeshjet e radhës kundër Italisë dhe Gjeorgjisë. Sulmuesi kosovar është shumë i lumtur që do ta realizojë ëndrrën – të luajë kundër kampionëve të botës. Nëse mposhtin Azzurrët, i ashtuquajturi ‘Terminatori’ nga tifozët malazezë, beson se do t’ia hapin vetes rrugën për një kualifikim të mundshëm në Botërorin 2010.


Trajneri i përfaqësueses së Malit të Zi, Zoran Filipoviç, ka publikuar listën për dy ndeshjet e radhës që do t’i zhvillojë kundër Italisë dhe Gjeorgjisë në kuadër të kualifikimeve për Botërorin 2010.

Në mesin e të ftuarve është edhe sulmuesi i skuadrës së Buduçnostit, Fatos Beçiraj, i cili për herën e parë ftohet në Kombëtaren A të Malit të Zi. Sulmuesi kosovar me paraqitjet e tij në elitën e futbollit malazez ka bindur trajnerin Filipoviç t’i bëjë një vend në skuadër.

Ish-sulmuesi i Besës nga Peja, ka thënë se këtë ftesë e ka pritur qe një kohë të gjatë, derisa kohën e fundit tregon se iu kishin ‘shuar’ shpresat për një grumbullim të mundshëm me përfaqësuesen A të Malit të Zi, për shkak të lëndimeve që e kishin lënë jashtë fushës për disa javë dhe formës jo të mirë.

Megjithatë, ai është shumë i lumtur që do të jetë pjesë e përfaqësueses malazeze në përballjen e 28 marsit kundër kampionëve të botës.

“Jam shumë i lumtur që do të luajë kundër kampionëve të botës, këtë e kam pasur ëndërr. Ky është një sukses i madh për mua”, ka thënë Beqiraj për Express të dielën.

Beqiraj beson se të shtunën do të debutojë në fanellën e Malit të Zi, edhe pse, pjesë e repartit sulmuesi në Kombëtaren malazeze do të jenë disa futbollistë të spikatur si Stevan Jovetic (Fiorentina) dhe Radomir Dalovic (Rapid Bukurest).

“Pasi trajneri e ka ftuar vetëm një sulmues klasik, atëherë ka gjasa shumë të mëdha që kundër Italisë të inkuadrohem në lojë”, theksoi ‘Terminatori’, siç e quajnë në Mal të Zi.

“Kundër Italisë do të jetë shumë vështirë, mirëpo me angazhimin e të gjithë futbollistëve dhe përkrahjen e shikuesve, besoj se do ta nxjerrim një rezultat pozitiv”, shtoi njëri ndër lojtarët kryesorë të Buduçnostit.

Përfaqësuesja malazeze në Grupin e 8 zë vendin e katërt me vetëm dy pikë të tubuara, tetë më pak se lideri i tabelës, Italia.

“Grupi është shumë i vështirë, nëse mposhtim Italinë, atëherë situata do të ndryshohet në grup dhe mund të shpresojmë për një kualifikim të mundshëm”, theksoi Beqiraj, i cili këtë sezon ka realizuar 11 gola.

Fatos Beqiraj që nga shtatori i vitit të kaluar ishte pjesë e përfaqësueses U-21 të Malit të Zi. Në fanellën e shpresave malazeze sulmuesi pejan ka zhvilluar dy ndeshje, derisa ka debutuar kundër Bullgarisë.