Loci jep dorëheqje

Loci jep dorëheqje

Bujar Loci nuk është më trajner i Pejës. Trajneri pejan ka dhënë dorëheqje, pas humbjes zhgënjyese në shtëpi nga Sigal Prishtina. Këtë e ka konfirmuar kryetari i klubit verdhezi, Fatmir Gashi. “Bujar Loci e ka paraqitur dorëheqjen menjëherë pas ndeshjes me Prishtinën, të cilën sigurisht se ia kemi aprovuar të hënën”, ka thënë ai për Express.

Loci ishte vërshëllyer dhe ishte fyer nga tifozët pejanë në minutat e fundit të ndeshjes me Sigal Prishtinës. Duket se kjo ka qenë arsyeja kryesore e vendimit të tij. Express është munduar ta kontaktojë Locin, por ka qenë e pamundur pasi ai nuk e ka hapur celularin.

Menjëherë pas largimit të Locit, kryesia e klubit pejan është angazhuar për gjetjen e trajnerit të ri. “Jemi në bisedime me katër trajnerë të huaj, përkatësisht nga Kroacia e Sllovenia. Të martën do të dihet emri i trajnerit të ri”, tha Gashi. Edhe pse u mposht nga Sigal Prishtina, Peja vazhdon të prijë në TechnoMarket Superligën A të basketbollit, me pikë të njëjta me Sigal Prishtinën, nga 31. Në fundjavë, verdhezinjtë do të udhëtojnë në Prizren me trajnerin e ri, ku i pret Bashkimi i rrezikshëm.