Nr. 1 me sponsorë

Nr. 1 me sponsorë

Klubi gjerman Bayern Munchen përfiton më së shumti para në botë nga sponsorët e fanellave. Gjiganti Bavarez merr 20 milionë euro në sezon nga kompania e telefonisë mobile T-Home. Pas tij renditen Manchester United me AIG (17.7 milionë) dhe Real Madrid me Bwin (15 milionë euro). Në përgjithësi më së shumti përfitojnë klubet nga Bundesliga gjermane, me 102.9 milionë euro në total.

Bayern Munchen, Manchester United, Real Madrid. Nuk është kjo renditja e favoritëve për ta fituar Ligën e Kampionëve (edhe pse klubi spanjoll është eliminuar), por është klasifikimi i klubeve që marrin më së shumti para nga sponsorët e fanellave.

Këtë statistikë e ka nxjerrë agjencia gjermane Sport und Markt, e specializuar në marketingun sportiv, në përvjetorin e publikimit të “Jersey Report 2008/09”.

Klubi Bavarez merr rreth 20 milionë euro nga T-Home (kompani e telefonisë mobile), kampioni aktual i Evropës, Manchester United merr 17.7 milionë euro nga AIG (kompani e sigurimeve), derisa klubi mbretëror Real Madrid paguhet 15 milionë euro nga Bwin (Kompani e basteve), e cila paguan 12 milionë euro të tjera për klubin italian Milan, i cili renditet i pesti.

Para tij gjendet Chelsea, që përfiton 12.6 milionë euro nga Samsung (kompani elektronike). 12 milionë euro nga sponsorët e fanellave i fiton edhe klubi gjerman Schalke nga Gazprom (kolosi energjetik rus).

Në sezonin 2008/09, Bundesliga është rikthyer në ligën lidere në botë sa i përket sponsorëve të fanellave, falë mesatares prej 7.4 milionë eurosh, respektivisht 102.9 milionë eurosh në total.

Kurse nga e para, në vendin e dytë ka dalë Premierliga, ku ndikim të madh pati edhe rënia e vlerës së funteve karshi euros si dhe kriza ekonomike botërore. Po ashtu, vlen të përmendet se klubi anglez Aston Villa ka hequr dorë nga milionat, duke preferuar që ta vendosë në fanellën e vet logon e një organizate bamirëse para ndonjë kompanie gjigante.