Bëhen gati për Malmo

Bëhen gati për Malmo
Përfaqësuesja e Kosovës është duke u bërë gati për miqësoren e 28 marsit kundër ekipit suedez, Malmo. Të përzgjedhurit e Edmond Rugovës të premten kanë aplikuar për viza, mirëpo drekuesit e FFK-së thonë se të hënën dihet përfundimisht se a do të udhëtojnë në Suedi apo jo.


Drejtuesit e Federatës së Futbollit të Kosovës (FFK) janë duke u bërë gati për udhëtimin e përfaqësueses së Kosovës në Suedi, respektivisht në Malmo, ku pritet ta zhvillojnë një ndeshje miqësore kundër këtij ekipi më 28 mars.

Të përzgjedhurit e selektorit Edmond Rrugova të premten kanë qëndruar në kryeqytetin maqedonas – Shkup, ku kanë aplikuar për viza në Ambasadën e Suedisë.

Këtë e ka konfirmuar edhe sekretari i përgjithshëm i FFK-së, Eroll Salihi. Mirëpo, sipas tij, ende nuk është e sigurt se a do të udhëtojë apo jo përfaqësuesja e Kosovës në Suedi.

“Është e vërtetë që futbollistët kanë aplikuar për viza, mirëpo ende nuk është e sigurt se a do të udhëtojmë apo jo. Jemi në pritje të ftesës origjinale dhe të hënën pritet të dihet përfundimisht se a do të shkojmë apo jo”n ka thënë Salihi për Express të premten.

Mirëpo në anën tjetër, ueb sajti zyrtar i kampionit të shumëfishtë të Suedisë, para një jave ka konfirmuar lajmin se Malmo do ta zhvillojë një ndeshje miqësore me Kosovën më 28 mars.

“Malmo falënderon FFK-në që ka pranuar ftesën për të zhvilluar ndeshjen miqësore më 28 mars. Ekipi i Kosovës do të jetë i përbërë nga lojtarët më të mirë të Superligës. Kjo ndeshje pritet të zgjojë interesim të madh nga shikuesit me prejardhje nga Kosova”, thuhet në ueb sajtin zyrtar të Malmos, www.mff.se.

Te skuadra e Malmos luajnë dy futbollistë me prejardhje nga Kosova, sulmuesi Agon Mehmeti dhe mesfushori ofanziv, Labinot Harbuzi.

Lista e futbollistëve

Edhe pse lista e futbollistëve ende nuk është bërë zyrtare, gazeta Express ka arritur t’i sigurojë emrat e shumicës së lojtarëve që pritet të udhëtojnë në Malmo.

Valmir Bytyqi, Enis Mangjolli, Roland Duraku, Erdin Hashani, Driton Vokshi, Shpëtim Idrizi, Labinot Ibrahimi, Dukagjin Gashi, Muhamet Dragusha, Yll Hoxha, Behrar Maliqi, Agron Skeraj, Bardhyl Kaqiu, Enis Zaberxha, Suad Saliagiç, Berat Hyseni, Faton Zejnullahu, Uliks Emra.