All Star në Therandë

All Star në Therandë
Basketbollistët më të mirë vendorë dhe ata të huaj që aktualisht luajnë në skuadrat e TechnoMarket Superligës A, të mërkurën do ta zhvillojnë një ndeshje ekzibicionale në Therandë. Lojtarët vendorë do t’i drejtoj Jeton Nixha, derisa të huajt, Aleksander Sarkanj.

Të mërkurën në Therandë do të zhvillohet ndeshja ekzibicionale në basketboll, ndërmjet ekipit që do të përbëhet me lojtarët më të mirë vendorë të skuadrave të TechnoMarket Superligës A dhe ekipit tjetër, për të cilin do të luajnë basketbollistët e huaj që luajnë në skuadrat kosovare.

Kjo ndeshje, e cila është e organizuar nga klubi Ylli, në bashkëpunim me Federatën e Basketbollit të Kosovës, zhvillohet në kuadër të revysë përkujtimore ‘Agu i Lirisë’. Organizimi i kësaj ndeshjeje është mbështetur edhe nga Ministria e Sportit si dhe nga Komuna e Therandës.

“Më 25 dhe 26 mars mbushen 10 vjet nga maskara e barbarit serb në Suharekë dhe rrethinë. Në mesin e këtyre viktimave ishin edhe tetë anëtarë të klubit Ylli”, thuhet në një komunikatë të lëshuar nga FBK-ja.

Anëtarët e skuadrës së Yllit, të cilët patën humbur jetën në këtë masakër nga regjimi i atëhershëm serb, ishin kryetari i klubit, Sedat Berisha bashkë me dy anëtarët e Kryesisë, Ruzhdi Krasniqi dhe Nexhat Berisha. Po ashtu, në këtë tragjedi jetën e patën humbur edhe këto basketbolliste dhe basketbollistë: Flora Berisha, Majlinda Berisha, Dafina Berisha, Vlonjat Berisha dhe Bujar Berisha.

Takimi ndërmjet lojtarëve vendorë dhe atyre të huaj do të fillojë në ora 19:00 në palestrën ‘13 Qershori’ në Therandë.

Basketbollistë vendorë
Valdet Grapci, Ersid Luca, Vigan Radoni (Peja), Edmond Azemi, Blerim Mazreku, Muhamet Hasani (Sigal Prishtina), Florian Rexhepi, Artan Kurti, Korab Ferizi (Bashkimi), Brahim Veseli, Drilon Hajrizi, Gazmend Asllani (Trepça) dhe Hasan Bytytqi (Ylli).”. Trajnerë: Jeton Nixha (Bashkimi) dhe Fikret Shatri (Sigal Prishtina).

Basketbollistë të huaj
Samir Shaptahoviq, Carlos Morban, Entony Knox (Peja), Keena Young, Kevin Owens, Brad Jones (Sigal Prishtina), Donte Geennie, Alvin Kadiq, Abdurrahman Karimanoviq (Bashkimi), John Gardiner dhe Kevin Guyeden (Trepça). Trajnerë: Aleksander Sarkanj (Trepça) dhe Boban Mitev (Peja).