Cana beson në kualifikim

Cana beson në kualifikim

Lorik Cana beson se Marseille do ta eliminojë gjigantin holandez Ajax nga Kupa UEFA. Përveç rezultatit, mesfushori kosovar mendon se skuadra nga Velodrom do ta ketë edhe një përparësi në ndeshjen e kthimit, pasi trajneri Erik Gerets njeh mirë futbollin e tulipanëve.

Marseille është mysafir i Ajaxit të mërkurën dhe Lorik Cana është i sigurt se mund ta eliminojë nga Kupa UEFA gjigantin holandez, i cili drejtohet nga legjenda Marco van Basten.

Ekipi nga stadiumi Velodrom fitoi ndeshjen e parë kundër ish kampionit të Evropës 2:1 në Francë dhe ka përparësi para ndeshjes së kthimit të 8 së finales së Kupës UEFA. Ndërsa morali i ekipit është shumë i lartë, pasi i janë afruar kryesuesit Lyon vetëm në një pikë në kampionatin francez.

Marseille të dielën mposhti 3-1 rivalin PSG në një paraqitje që mund të jetë përgatitje ideale për takimin si mysafir në Amsterdam Arena.

“Besimi ynë është shumë i madh dhe kjo duhet të na ndihmojë të vazhdojmë tutje”, ka thënë Cana për mediat franceze.

Trajneri i Marseilles, Erik Gerets, ka luajtur dhe më pas ka drejtuar ekipin holandez PSV Eindhoven, ndërsa Cana mendon se kjo është një përparësi për ta.

“Ne kemi një trajner që njeh futbolli holandez”, tha Cana i cili shënoi goli kundër PSG-së të dielën.

“Ne do ta dëgjojmë trajnerin dhe do të mundohemi ta aplikojmë atë që e thotë ai. Ndoshta do të ketë ndryshime, por Marsille do ta ketë një skuadër mjaftë kompakte në fushë”, shtoi kosovari.

Ndërsa mesfushori i Kombëtares shqiptare ditë më parë ka thënë se është optimist se ekipi nga Velodrome do të shkojë deri në finale të Kupës UEFA.

Skuadra franceze në të 16-ën e finales nga Kupa UEFA kishte eliminuar ekipin holandez Twente, i cili drejtohet nga ish selektori i Anglisë, Steve McClaren.

Përveç Marseilles, të mërkurën do të përballet edhe ekipi tjetër francez Saint-Etienne dhe ai gjerman Werder Bremen. Ndërsa të gjitha ndeshjet e tjera do të luhen të enjten.